काठमाडौं: दुई दिनसम्म चलेको तीव्र प्रतिस्पर्धा, घमासान खेल र उत्कृष्ट खेल भावनापछि अल्फा बिटा प्रेजन्ट्स +२ इन्टरकलेज फुटसल टुर्नामेन्ट २०२६ को विजेता घोषणा भएको छ। लिङ्कन इन्टरनेसनल कलेजको सहकार्यमा आयोजित यस प्रतियोगितामा डीएभी कलेजले च्याम्पियन ट्रफी हात पार्दै उपाधि चुम्न सफल भयो।
फाइनलमा उत्कृष्ट प्रदर्शन गर्दै डीएभी कलेजले उपविजेता एआईटीएम कलेजलाई पराजित गर्यो भने नाइटिङ्गेल कलेजले तेस्रो स्थान सुनिश्चित गर्यो। दुई दिनसम्म मैदानमा देखिएको उच्चस्तरीय फुटसल, युवा खेलाडीहरूको जोस र दर्शकको उत्साहले टुर्नामेन्टलाई यादगार बनाएको थियो।
तीव्र प्रतिस्पर्धा र खेल भावना
टुर्नामेन्ट सुरु भएदेखि नै कलेजहरूबीच कडा प्रतिस्पर्धा देखियो। समूह चरणदेखि सेमिफाइनलसम्मका खेलहरूमा खेलाडीहरूले आफ्नो उत्कृष्ट प्रदर्शन देखाए। फाइनलमा डीएभी कलेजको आक्रामक शैली र बलियो डिफेन्स निर्णायक साबित भयो। एआईटीएम कलेजले पनि कडा प्रतिरोध गरे पनि उपाधि चुम्न भने सकेन। नाइटिङ्गेल कलेजले तेस्रो स्थानका लागि भएको खेलमा राम्रो प्रदर्शन गर्दै पोडियममा स्थान सुरक्षित गर्यो।
आयोजकहरूका अनुसार यस प्रतियोगिताले +२ तहका विद्यार्थीहरूबीच फुटसलको लोकप्रियता बढाउनुका साथै खेल भावना, टिमवर्क र अनुशासनको सन्देश दिएको छ।
प्रायोजक र साझेदारको बलियो साथ
यति ठूलो स्तरको टुर्नामेन्ट सफल बनाउन प्रायोजक र साझेदारहरूको महत्त्वपूर्ण भूमिका रह्यो। शिखर इन्स्योरेन्स इन्स्योरेन्स पार्टनर, सुबिसु इन्टरनेट पार्टनर, ग्लोबल आईएमई बैंक बैंकिङ पार्टनर, पियर्सन लर्निङ पार्टनर, अल्फा केयर डायग्नोस्टिक सेन्टर हेल्थ केयर पार्टनर, अल्फा हाउस ब्याङ्क्वेट र वासाबी फुड पार्टनर, सालबारी हेरिटेज भिल्ला हस्पिटालिटी पार्टनर तथा एका कोम्बुचा बेभरेज पार्टनरका रूपमा रहेका थिए।
धन्यवाद र आगामी संस्करणको प्रतीक्षा
आयोजक अल्फा बिटाले सहभागी सबै कलेज, प्रशिक्षक, रेफ्री र उत्साहपूर्ण दर्शकलाई विशेष धन्यवाद दिएको छ। ‘दुई दिनसम्मको उच्च अक्टेन खेल, तीव्र प्रतिस्पर्धा र अद्भुत खेल भावनापछि हामीसँग आधिकारिक विजेता छन्। अर्को संस्करणमा फेरि भेटौंला,’ आयोजकको सन्देशमा भनिएको छ।
यस टुर्नामेन्टले युवा पुस्तामा खेलकुदप्रति आकर्षण बढाउनुका साथै कलेजहरूबीच स्वस्थ प्रतिस्पर्धाको संस्कृति विकास गर्न मद्दत पुर्याएको छ। डीएभी कलेजको उपाधि जितसँगै एआईटीएम र नाइटिङ्गेल कलेज पनि उत्कृष्ट प्रदर्शनका लागि चर्चामा छन्। अल्फा बिटाले हरेक वर्ष यस्तै अन्तरकलेज फुटसल टुर्नामेन्ट आयोजना गर्दै आएको छ।
अल्फा बिटा ग्रुपका मार्केटिङ म्यानेजर रेक्स रञ्जितकारका अनुसार यस सम्पन्न सिजनपछि यस प्रतियोगितालाई रनिङ सिल्डका रूपमा रहनेछ । यससँगै अब विजेता टोलीले ट्रफी ६ महिनापछि अर्को सिजनका लागि आयोजकलाई फिर्ता दिनुपर्नेछ ।
