जीब्रोको क्यान्सरले जीवन नै अन्धकार बनाइदिएको थियो। बोल्न, खान र सास फेर्न पनि गाह्रो। दुखाइ र ऐंठनले रातभरि निद्रा लाग्दैनथ्यो। उपचारका सबै विकल्प समाप्त भइसकेका थिए। तर, सन् २०२५ मा एक नयाँ सिरिन्जले ५६ वर्षीय कार्ल वाल्सको जीवन फेरिदियो।
“अहिले म सामान्य जीवन बिताउन थालेको छु,” कार्लले खुसी हुँदै भने, “यो औषधिले मलाई नयाँ जीवन दिएको छ।”
अमिभान्तामाब’ – आशाको नयाँ किरण
जोन्सन एन्ड जोन्सन कम्पनीले विकास गरेको ‘अमिभान्तामाब’ नामक यो इन्जेक्सनले क्यान्सर उपचारको क्षेत्रमा ऐतिहासिक सफलता हासिल गरेको छ। जुन बिरामीहरूमा केमोथेरापी र इम्युनोथेरापी दुवै असफल भएका थिए, उनीहरूमा पनि यो औषधिले ट्युमर पूर्ण रूपमा गायब पारिदिएको छ।
लन्डनस्थित इन्स्टिच्युट अफ क्यान्सर रिसर्चका प्राध्यापक केभिन ह्यारिङ्टनले भने, “यो नतिजा अभूतपूर्व हो। उपचारका सबै विकल्प समाप्त भएका बिरामीहरूमा यस्तो बलियो प्रभाव देखिनु निकै आश्चर्यजनक छ। यो औषधिले हरेक वर्ष हजारौं बिरामीलाई बचाउन सक्छ।”
परीक्षणको चौंकाउने नतिजा
११ वटा देशमा गरिएको क्लिनिकल परीक्षणमा टाउको र घाँटीको क्यान्सर भएका १०२ जना बिरामी सहभागी थिए। यो संसारकै छैटौं सबैभन्दा बढी देखिने क्यान्सर हो।
परीक्षणको नतिजा यस्तो रह्यो:
४३ जनाको ट्युमर खुम्चियो वा पूर्ण रूपमा गायब भयो
१५ जनाको ट्युमर पूर्ण रूपमा हट्यो
२८ जनाको ट्युमर उल्लेखनीय रूपमा सानो भयो
एक तिहाइभन्दा बढी बिरामीमा ट्युमर खुम्चिएको देखिएको छ भने सिरिन्ज लगाएको केही सातामै प्रभाव देखिन थालेको छ। फोक्सोको क्यान्सरमा पनि यही सकारात्मक नतिजा देखिएको छ।
कसरी काम गर्छ यो औषधि?
अमिभान्तामाबले क्यान्सर फैलाउने प्रोटिनलाई रोक्छ र शरीरको रोग प्रतिरोधात्मक प्रणाली (इम्युन सिस्टम) लाई सक्रिय बनाएर ट्युमरविरुद्ध लड्न मद्दत गर्छ। यो दुई शक्तिशाली प्रभावको संयोजन हो जसले क्यान्सरको जरा नै उखेलेर फाल्छ।
अब विश्वव्यापी परीक्षण
हाल विश्वभर करिब ६० वटा विभिन्न क्लिनिकल परीक्षण भइरहेका छन्। मुख्य रूपमा फोक्सो, मस्तिष्क, पेट र ठूलो आन्द्राको क्यान्सरमा यसको प्रभावकारिता जाँचिँदै छ। यो अनुसन्धानको नतिजा सिकागोमा हुने अमेरिकन सोसाइटी अफ क्लिनिकल ओन्कोलोजी (ASCO) को वार्षिक बैठकमा प्रस्तुत हुँदै छ।
आशा र सम्भावना
यो सफलताले अन्तिम चरणका क्यान्सर बिरामीहरूका लागि नयाँ ढोका खोलिदिएको छ। जुन बिरामीहरूलाई ‘अब केही गर्न सकिँदैन’ भनिन्थ्यो, उनीहरूमा पनि पूर्ण निको हुने सम्भावना देखिएको छ।
कार्ल वाल्सजस्ता हजारौं बिरामीहरूका लागि यो औषधि जीवनको अन्तिम किरण बन्न सक्छ। चिकित्सकहरू भन्छन् -यो औषधिले क्यान्सर उपचारको इतिहासमा नयाँ अध्याय थप्न सक्छ।
